pleiv Flond

Cordial beinvegni en la pleiv reformada Flond

maletgs dalla fiasta ecclesiastica 2017 Castrisch

 

La pleiv da Flond e sia historia

Ord la cronica da Flond
Da Andrea Darms 1991

Ha ina pleiv da renovar ni restaurar oziligi ina baselgia ni caplutta, sto ella saver igl emprem co finanziar l’ovra.

Senza agid finanzial d’ordsura va ei pil pli buc. Pauc auter era quei el temps vargau.
Igl onn 1713 vegn la baselgia da Flond baghegiada. Per saver finanziar ella tarmetta il vischinadi da Flond dus vischins per la Svizra entuorn per rimnar raps. Ils dus curriers Ulrich Lanthen (Lutta) e Ricco Camenisch han ina brev da recumandaziun en sac, cun suttascripziun e sigil da Hans Ulrich Bodmer, cusseglier dil ludeivel marcau da Turitg e dil castellan dil segneradi da Sax e Forstegg. Ina delegaziun da Flond cun il cau dil vitg alla testa cumpara ils 1714 avon il cau dil marcau da Glion e dalla Foppa culla supplica da sustener er recumandar ina collecta per la baselgia da Flond che seigi bein en construcziun, mo che sappi per munconza da daners buca vegnir finida. E dils 7 da settember 1715 datescha in brev dils caus dallas Treis Ligias, che recamondan en quella cauldamein la collecta per la baselgia da Flond.
Ina tala ovra stoppi esser benedida da Deus. Ils deputai da Flond seigien cumpari – aschia ils acts archivals – Els vegnien da Flond, ina vischnaunchetta da 160 olmas, che stetti sin in cuolm in’ ura mesa naven da Sogn Martin. Las vias da Flond a Sogn Martin seigien miserablas, cunzun d’unviern pervia dallas massas da neiv e glatsch. Glieud veglia,. femnas en speronza ed affons sappien era pervia dad urezis anetgs buca bein frequentar il survetsch divin ed autras radunonzas ecclesiastas aschi savens sco ei fussi necessari e giavischeivel. Schliet stetti ei era cun ils transports da baras; fetg impedius seigi il battem; grev vomi ei al plevon da visitar malsauns per confortar els, era per dar catechismus als affons; e lu seigi aunc bia auter restrenschiu en consequenza dil uiadi stentus a Sogn Martin. Perquei baghegi Flond sez ina baselgia, era per haver agen plevon en vischnaunca. Mo ils mieds seigien memia scarts; e perquei vulessien els supplicar per agid.avon ils caus dallas Treis Ligias en moda zun devota e honesta, sco ei deschi a tals.